कल्याण : पूर्वेकडे असलेल्या पूना लिंक रोडला बुधवारी सायंकाळच्या सुमारास विचित्र अपघात घडला. ब्रेक फेल झाल्याने चालकाचे नियंत्रण सुटल्यानंतर डंपरने धडक दिल्यामुळे ५ वाहने क्षतिग्रस्त झाली. तथापी सुदैवाने या अपघातात कोणतीही जीवितहानी झाली नाही.
अपघातास कारणीभूत ठरलेल्या एम एच 05 /सी बी/ 9111 क्रमांकाच्या डंपरसह चालकाला कोळसेवाडी पोलिसांनी ताब्यात घेतले आहे. हा डंपरने कुठून आला आणि कुठे चालला होता ? याचा तपशील मिळू शकला नाही. मात्र या अपघातामुळे परिसरात वाहतूक खोळंबली होती. तर बघ्यांनी मोठी गर्दी केली होती. स्थानिक पोलिसांसह वाहतूक नियंत्रण शाखेच्या पोलिसांनी घटनास्थळी धाव घेऊन गर्दी कमी केली. वाहतूक पोलिसांनी रस्त्यावर झालेली वाहतुकीची कोंडी दूर केली. त्यानंतर अपघातग्रस्त वाहनांना डंपरपासून विलग करण्यात आले. या अपघातात 5 वाहनांचे मात्र मोठे नुकसान झाले.
या वाहनांमध्ये ऑक्सिजन सिलेंडर भरलेल्या ट्रकसह टेम्पो, कार, रिक्षाचा समावेश असल्याचे सूत्रांकडून सांगण्यात आले. हा अपघात नेमका कशामुळे घडला ? हे अद्याप समजू शकलेले नाही. बहुदा चालकाचा डंपरवरील ताबा सुटला असावा, सदर डंपरचे ब्रेक फेल झाले असावेत किंवा चालकाच्या चुकांमुळे हा अपघात घडला असावा, असा पोलिसांचा कयास आहे. मात्र तांत्रिक चौकशीनंतर अपघाताचे कारण उघड होणार आहे.