डोंबिवली , दि,16 : शहरात दिवसेंदिवस फेरीवाल्यांची दादागिरी वाढत असून, एका रुग्णवाहिका चालकास मारहाण केल्याच्या प्रकार घडला आहे.
भोपर येथे राहणारे गणेश माळी (30) हा डोंबिवली पूर्वेतील पूजा मधुबन चित्रपट गृहासमोर असणाऱ्या एका खाजगी रुग्णालयात रुग्णवाहिका चालक म्हणून काम करतो. याच रुग्णालयाच्या रस्त्यावर आजूबाजूला अनेक फेरीवाल्यांनी रस्ता अडवून आपले बस्तान मांडले आहे. फूटपाथला लागूनच हे फेरीवाले बसत असल्याने काही कडापे त्यांनी या ठिकाणी ठेवले आहेत. आज दुपारी रुग्णवाहिका घेऊन जाण्यासाठी चालक माळी रुग्णवाहिका फिरवून घेत असताना फुटपाथवर ठेवलेल्या एका कडाप्याला रुग्णवाहिकेची धक्का लागला. यामुळे येथे बसणारे चार ते पाच फेरीवाले रुग्णवाहिका चालक गणेश माळी याला जाब विचारण्यासाठी आले आणि त्याच्याशी बाचाबाची करून शिवीगाळ करून लागले. बाचाबाची करताना संतप्त झालेले या फेरीवाल्यांनी रुग्ण वाहिका चालकाला बेदम मारहाण केली. यामुळे हा रुग्णवाहिका चालक गंभीर जखमी झाला असून त्याच्यावर खाजगी रुग्णालयात उपचार करण्यात आले आहे. या संदर्भात जखमी माळी यांच्या फिरयादीवरून अनिल गुप्ता आणि रोहित गुप्ता या दोघांवर रामनगर पोलीस ठाण्यात गुन्हा दाखल केला असून अधिक तपास पोलीस करत आहेत.
—–