मुंबई : महाराष्ट्र राज्य माध्यमिक व उच्च माध्यमिक शिक्षण मंडळातर्फे फेब्रुवारी मार्च २०२३ मध्ये घेण्यात येणा-या दहावी बारावीच्या लेखी परीक्षांचे अंतिम वेळापत्रक जाहीर करण्यात आले आहे. बारावीची लेखी परीक्षा २१ फेब्रुवारी ते २१ मार्च २०२३ या कालावधीत होणार आहे. तर तर दहावीची लेखी परीक्षा २ मार्च ते २५ मार्च २०२३ या कालावधीत होणार आहे.
मुंबई, पुणे, नागपूर, औरंगाबाद, कोल्हापूर, अमरावती, नाशिक, लातूर आणि ककोकण या नऊ विभागात मंडळामार्फत बारावी आणि दहावीच्या परीक्षा घेतल्या जातात लेखी परीक्षेचं संभाव्य वेळापत्रक या आधी १९ सप्टेंबर २०२२ रोजी प्रसिध्द करण्यात आले होते त्यानंतर वेळापत्रकाबाबत सूचना मागवण्यात आल्या होत्या. वेळापत्रकाबाबत आलेल्या सुचनांनंतर दहावी बारावी परिक्षेचं अंतिम वेळापत्रक जाहीर करण्यात आले.
प्रात्याक्षिक परीक्षा श्रेणी तोंडी परीक्षा आणि अन्य विषयांचे वेळापत्रक स्वतंत्रपणे परीक्षेपूर्वी मंडळामार्फत शाळा आणि कनिष्ठ महाविद्यालयांना कळविण्यात येणार आहे अशी माहिती महाराष्ट्र राज्य माध्यमिक व उच्च माध्यमिक शिक्षण मंडळाकडून देण्यात आली आहे. दहावी बारावीच्या परीक्षांचे सविस्तर अंतिम वेळापत्रक मंडळाच्या www.mahahsccboard.in या अधिकृत संकेतस्थळावर उपलब्ध आहे. मंडळाच्या संकेतस्थळावरील वेळापत्रकाची सुविधा ही फक्त माहितीसाठी आहे. परीक्षेपूर्वी माध्यमिक शाळा, उच्च माध्यमिक शाळा, कनिष्ठ महाविद्यालयांकडे छापील स्वरूपात देण्यात येणारे वेळापत्रक अंतिम असेल. मंडळाकडून देण्यात आलेल्या छापील वेळापत्रकावरून परीक्षेच्या तारखांची खात्री करून विद्यार्थ्यांनी परीक्षा द्यावी,अशी माहिती मंडळाकडून देण्यात आली आहे.