डोंबिवली : भररस्त्यात चालणा-या एसटी बसमधून आवाज आल्यानंतर बस थांबवून पाहिल्यानंतर धक्कादायक प्रकार समोर आला. बसमधील एका चाकाचे सर्व नट-बोल्टच गायब होते. मात्र हा प्रकार वेळेवर माहिती पडल्याने मोठा अपघात टळला आहे. प्रवाशांच्या जीवाशी खेळ सुरू असल्याचेच यावरून दिसून आले.
कल्याण-शिळ रोडवर असलेल्या डोंबिवलीच्या मानपाडा पोलिस ठाण्यासमोर एसटीची एम एच 14/बी टी/4010 क्रमांकाची एक बस भररस्त्यात थांबली होती. कल्याणमध्ये राहणारे सामाजिक कार्यकर्ते योगेश दळवी त्या रस्त्यावरुन जात असताना त्यांची नजर या बसवर पडली. चालक आणि वाहकाला विचारपूस केली असता अजब माहिती मिळाली. बसमधील एका टायरचे नट-बोल्ट गायब असल्याचे आढळून आहे. हा प्रकार समजताच बसमधील जवळपास 30-32 प्रवाशांना उतरविण्यात आले आणि बस दुरुस्तीसाठी कल्याण बस आगाराला संपर्क करण्यात आला. योगेश दळवी यांनी बसचा व्हिडीओ काढला. नट-बोल्ट कसे पडले ? याबद्दल कुणालाही काही सांगता येत नव्हते. मात्र बस डेपोमधून निघताना बसची चाचणी केली नव्हती. हा प्रवाशांच्या जीवाशी खेळ सुरु असून शासनाने आणि परिवहन मंत्र्यांनी याकडे लक्ष दिले पाहिजे, अशी मागणी दळवी यांनी केली आहे. या बाबत कल्याण बस डेपोचे मॅनेजर विजय गायकवाड यांनी सांगितले की, ही बस पनवेल डेपोची आहे. सदर कल्याण-मुरुड मार्गावर चालणारी आहे. बसच्या दुरुस्तीचे काम कल्याण डेपोमध्ये सुरु आहे.