कल्याण – : सार्वजनिक गणेशोत्सव मंडळांना कुठल्याही परवानगीसाठी कोणत्याही प्रकारचे शुल्क आकारले जाणार नाही असा महत्वाचा निर्णय केडीएमसी प्रशासनाने घेतला आहे त्यामुळे कोरोना काळात गणेशोत्सव मंडळांना दिलासा मिळाला आहे
यंदाच्या गणेशोत्सवावरही कोरोनाचे सावट असून आर्थिक अडचणीत आलेल्या गणेशोत्सव मंडळांना शुल्कमाफ करण्याची मागणी गणेशोत्सव मंडळांसह सामाजिक, राजकीय व्यक्तींकडून केली जात होती. या पार्श्वभूमीवर आज झालेल्या बैठकीत केडीएमसी आयुक्त डॉ. विजय सूर्यवंशी यांनी सार्वजनिक गणेशोत्सव मंडळांसोबत ऑनलाईन बैठक घेत त्यांचे म्हणणे ऐकून घेतले. तसेच कोवीडबाबत शासनाकडून जारी करण्यात आलेले नियम पाळून सार्वजनिक गणेशोत्सव साजरा करण्याचे आवाहन करत शुल्कमाफीचा निर्णय जाहीर केला.
कोरोनाचे संकट पाहता यावर्षी सार्वजनिक गणेशोत्सव मंडळांकडून परवानगीसाठी त्याचप्रमाणे फायर एनओसीसाठी कुठलेही शुल्क आकारले जाणार नसल्याचे स्पष्ट करत सर्व सार्वजनिक गणेश मंडळांनी तसेच इमारतीमध्ये बसविल्या जाणा-या गणेश मंडळांनीही फायर एनओसी घेणे बंधनकारक असल्याची माहिती आयुक्त डॉ. सूर्यवंशी यांनी दिली. सार्वजनिक गणेशोत्सव मंडळाच्या मंडपाची साईज 6×8 इतकीच असावी. गतवर्षी गणेशोत्सवानंतर महापालिका परिसरातील कोरोनाची रुग्ण संख्या दुपट्टीने वाढली त्यामुळे शासनाच्या मार्गदर्शक सुचनांचे तसेच कोविड नियमांचे पालन करुन जबाबदारीने आणि विहित परवानग्या घेवूनच हा सण साजरा करण्याचे आवाहन डॉ. विजय सूर्यवंशी यांनी यावेळी केले. या ऑनलाईन बैठकीमध्ये महापालिका क्षेत्रातील सुमारे 92 सार्वजनिक गणेशोत्सव मंडळांनी सहभाग घेतला होता.
‘एक खिडकी योजना’…
सार्वजनिक गणेशोत्सव मंडळांना वाहतूक पोलिस, अग्निशमन विभागाचा ना-हरकत दाखला, महावितरणकडील तात्पुरती वीज मीटरची परवानगी आणि स्थानिक पोलिस स्टेशनचा ना-हरकत दाखला आदी परवानग्या देण्यासाठी संबंधित प्रभागक्षेत्र अंतर्गत स्थानिक पोलिस स्टेशननिहाय कर्मचा-याची नियुक्ती केली जाणार आहे. त्याअंतर्गत “एक खिडकी योजना” कार्यान्वित करण्यात येणार असून मंडळांनी परवानगीसाठी ५ सप्टेंबर, सायंकाळी ६ वाजेपर्यंत अर्ज सादर करण्याचे आवाहन त्यांनी यावेळी केले.
152 सीसीटीव्ही कॅमे-यांचा वॉच
महापालिका परिसरात एकुण ६८ विसर्जन स्थळांवर श्रीगणेश विसर्जनाची व्यवस्था करण्यात आलेली असून विसर्जन स्थळी आणि विसर्जन मार्गांवर १५२ सीसीटीव्ही कॅमे-यांचा वॉच असणार आहे. तसेच या सर्व ठिकाणी २ हजार ४४७ हॅलोजन लाईटची व्यवस्था करण्यात आली असून प्रकाश व्यवस्थेसाठी एकुण ६६ जनरेटर बसविण्यात येणार आहेत.