कल्याण : कल्याण डोंबिवली महापालिका आयुक्तांच्या गाडीचा पाठलाग करणा-या पालिकेच्या एका कंत्राटी वाहन चालकाला चांगलेच अंगाशी आले आहे. महापालिका आयुक्त इंदूराणी जाखड यांनी या कर्मचाऱ्यांची चौकशी करत संबंधित विभागास कारवाई करण्यास सांगितले आहे. ही माहिती सोशल मीडियावर व्हायरल झाल्यानंतर एकच खळबळ उडाली आहे. या प्रकरणी काही अधिकारी बचावात्मक पवित्रा घेत असल्याची चर्चा आहे. या प्रकरणी चौकशी करत योग्य ती कारवाई करण्यात येईल असे पालिकेच्या उपायुक्त अर्चना दिवे यांनी सांगितले.
धर्मेंद्र सोनवणे असे या कर्मचाऱ्याचे नाव आहे. पालिका आयुक्त इंदुराणी जाखड यांचा काल केडीएमसीच्या अ प्रभाग कार्यालय क्षेत्रात पाहणी दौरा होता. या दौऱ्या दरम्यान आयुक्त जाखड यांच्या गाडीचा धर्मेंद्र सोनवणे हा कंत्राई चालक दुचाकीने पाठलाग करत होता. ही बाब लक्षात येताच आयुक्तांनी त्याच्या गळ्यात असलेले आयकार्ड पाहिले. गाडी रस्त्याच्या बाजूला उभी करत सोनवणे यांची चौकशी केली. संबंधित विभागाला सोनवणे याच्यावर कारवाई करण्याच्या सूचना दिल्या. याची माहिती सोशल मीडियावर व्हायरल झाल्याने एकच खळबळ उडाली आहे. या प्रकरणाची चौकशी करत योग्य ती कारवाई करणार असल्याचे उपायुक्त अर्चना दिवे यांनी सांगितले.
यादरम्यान आयुक्त कोणत्या परिसरात जात आहेत हे पाहण्यासाठी धर्मेंद्र सोनवणे आयुक्तांच्या गाडीचा पाठलाग करत होता. याबाबत सोनवणे कुणाला तरी माहिती देत असल्याचे बोलले जात आहे. सोनवणे कुणाला काय माहिती देत होता हे चौकशी नंतर स्पष्ट होणार आहे. दरम्यान अ प्रभाग कार्यालय क्षेत्रात राजरोसपणे अनधिकृत बांधकाम सुरू आहेत. महापालिका आयुक्तांच्या दौऱ्यामुळे भूमाफियांसह त्यांना पाठीशी घालणाऱ्या अधिकारी कर्मचाऱ्यांचे देखील धाबे दणाणले होते. आयुक्त यांच्या दौऱ्या आधीच सगळं सुस्थितीत असल्याचे दाखवून द्यायचे असल्याने आयुक्तांच्या दौऱ्याची माहिती काढण्यासाठी हा प्रकार घडल्याची माहिती सूत्रांनी दिली आहे. या संपूर्ण प्रकरणाची चौकशी करून संबंधित अधिकारी कर्मचाऱ्यांवर कारवाई करण्याची मागणी आता जोर धरू लागली आहे.