गोलघाट, 03 जानेवारी : आसामच्या डेरगावमध्ये आज, बुधवारी झालेल्या अपघातात 12 जणांचा मृत्यू झाला. तर 27 जण गंभीर जखमी आहेत. प्रवासी बस आणि ट्रक यांच्या समोरा-समोर भीषण टक्कर होऊन हा अपघात घडला.
पोलिसांनी दिलेल्या माहितीनुसार, धार्मिक पर्यटनासाठी एका प्रवासी बसने 41 जण तिनसुकियामधील तिलिंगा मंदिरात दर्शनासाठी जात होते. ही बस आसममधील डेरगावजवळ असताना पहाटे 5 वाजेच्या सुमाराला एका कोळशानं भरलेल्या ट्रकवर जाऊन धडकली. ट्रक मार्गेरिटा येथून येत होता आणि त्यात कोळसा भरला होता. दोन्ही वाहनांची धडक खूप भीषण होती. दोन्ही वाहानांचा चक्काचूर झाला.
तसेच, बसमधील 12 प्रवाशांचा जागीच मृत्यू झाला. तर बसमधून प्रवास करणारे इतर 27 जण गंभीर जखमी आहेत, त्यांच्यावर उपचार सुरू आहेत. बस आणि ट्रकची धडक झाल्यानंतर मोठा आवाज झाला. आवाज ऐकून स्थानिकांनी घटनास्थळाच्या दिशेने धाव घेतली. स्थानिकांनी अपघाताची माहिती पोलिसांनी दिली.
पोलीस येण्यापूर्वीच स्थानिकांनी तात्काळ मदतकार्य सुरू केले होते. बसमधील जखमींना स्थानिकांनी बाहेर काढले आणि तात्काळ रुग्णालयात पाठवले. बसमधील सर्व प्रवाशांना जवळच असलेल्या जोरहाट मेडिकल कॉलेजमध्ये दाखल करण्यात आले आहे. त्यापैकी डॉक्टरांनी 12 जणांना मृत घोषित केलं आणि इतर 27 जणांवर उपचार सुरू आहेत.