डोंबिवली : अंबरनाथमध्ये राहणाऱ्या एका महाविद्यालयीन विद्यार्थ्याला कल्याणजवळील शहाड जकात नाक्यावर असलेल्या पेट्रोल पंप जवळून भागात तीन जणांनी दहशतीचा अवलंब करून ताब्यात घेतले. त्याला म्हारळ गाव भागातील टेकडीवर बळजबरीने नेऊन त्याला चाकुचा धाक दाखवून त्याच्या जवळील १६ हजार रूपये लुटले.
म्हारळ टेकडीवर तीन जणांनी अपहृत विद्यार्थ्याला बेदम मारहाण केली. त्याला चाकुचा धाक दाखवून मारण्याची धमकी दिली. मंगळवारी रात्री तीन वाजताच्या दरम्यान हा प्रकार घडला आहे. कल्याण शहरातील लुटीच्या या घटनांनी नागरिक हैराण आहेत. कल्याण रेल्वे स्थानक परिसर गुन्हेगारांचा अड्डा बनला आहे. महात्मा फुले पोलीस ठाण्यात या अपहरण प्रकरणी गुन्हा दाखल करण्यात आला आहे.
नीरज भोलानाथ यादव (२०) असे अपहरण करून मारहाण झालेल्या मुलाचे नाव आहे. तो अंबरनाथ भागात राहतो. विनायक मदने, विजय, आर्यन अशी आरोपींची नावे आहेत.
पोलिसांनी सांगितले, मंगळवारी रात्री तीनच्या सुमारास तक्रारदार नीरज शहाड जकात नाका येथे घरी जाण्यासाठी उभा होता. तो वाहनाची वाट पाहत होता. तेवढ्यात तेथे आरोपी आले. त्यांनी नीरजला काही न सांगता जबरदस्तीने त्यांच्या दुचाकीवर बसविले. नीरज एकटाच असल्याने तो प्रतिकार करू शकला नाही.
म्हारळ गावजवळील टेकडीवर नीरजला रात्री नेऊन तेथे त्याला बेदम मारहाण सदर तीन जणांनी केली. त्याला चाकुचा धाक दाखवून जीवे मारण्याची धमकी देण्यात आली. नीरज जवळील डेबिट, क्रेडिट कार्ड, त्याच्या जवळील रोख रक्कम आरोपींनी काढून घेतली. जवळील एटीएम मधून नीरज समोरच त्याच्या बँक खात्यामधील रक्कम काढली. एकूण १६ हजाराचा ऐवज लुटून झाल्यानंतर आरोपींनी नीरजला तेथेच सोडून पळ काढला. नीरजने महात्मा फुले पोलीस ठाणे गाठून तक्रार केली.
***