डोंबिवली, दि : २३; (प्रतिनिधी):
कल्याण ग्रामीण विधानसभा मतदारसंघात यंदा मोठा राजकीय बदल घडला असून महाराष्ट्र नवनिर्माण सेनेचे (मनसे) एकमेव आमदार राजू पाटील यांचा बालेकिल्ला शिवसेनेच्या (शिंदे गट) राजेश मोरे यांनी भेदला आहे. तब्बल ६६, हजार ३९६ मतांनी विजयी होत राजेश मोरे यांनी यंदाच्या विधानसभा निवडणुकीत ऐतिहासिक कामगिरी केली आहे. या विजयामध्ये खासदार डॉ. श्रीकांत शिंदे यांचे मोलाचे योगदान असून, त्यांनी संपूर्ण प्रचार काळात तळ ठोकून मोरे यांचा विजय सुनिश्चित केला.
शिवसेनेचा (शिंदे गट) विजयाचा डंका
राजेश मोरे (शिंदे गट): १,४१,१६४ मते
राजू पाटील (मनसे): ७४,७६८ मते
सुभाष भोईर (शिवसेना – उद्धव ठाकरे गट): ७०,०६२ मते
शिवसेनेच्या (शिंदे गट) उमेदवार राजेश मोरे यांनी ६५ हजारांहून अधिक मताधिक्याने या मतदारसंघात मोठा विजय मिळवला आहे. शिवसेनेच्या अंतर्गत मतविभाजनाचा फायदा उठवत त्यांनी विरोधकांचे गणित बिघडवले.
कल्याण ग्रामीणमध्ये बदलाची परंपरा कायम
गेल्या २० वर्षांत कल्याण ग्रामीण विधानसभा मतदारसंघात एकाच आमदाराला सलग निवडून देण्याची परंपरा मतदारांनी कधीही ठेवलेली नाही. या परंपरेला धरून यंदाही स्थानिक मतदारांनी मनसेचे विद्यमान आमदार राजू पाटील यांना नाकारत शिवसेनेच्या (शिंदे गट) नवोदित उमेदवार राजेश मोरे यांना आपला कौल दिला.
तुल्यबळ लढतीत राजकीय डावपेच ठरले निर्णायक
शिवसेनेच्या शिंदे गटाने उमेदवारी प्रक्रियेत आखलेल्या राजकीय डावपेचांमुळे मनसेचे राजू पाटील आणि ठाकरे गटाचे सुभाष भोईर यांचे गणिते बिघडली. डोंबिवली शहर प्रमुख असलेले राजेश मोरे यांना मुख्यमंत्री एकनाथ शिंदे आणि खासदार डॉ. श्रीकांत शिंदे यांचे ठाम पाठबळ मिळाले. डॉ. शिंदे यांनी प्रचाराच्या शेवटच्या टप्प्यात कल्याण ग्रामीणमध्ये तळ ठोकल्याने मोरे यांच्या विजयाचा मार्ग सुकर झाला.
मोरे यांचा विजय कसा घडला?
- मतांचे विभाजन: शिंदे गटाने ठाकरे गटातील शिवसैनिकांची मतं फोडून महत्त्वाचा विजय खेचून आणला.
- भाजपचा अप्रत्यक्ष पाठिंबा: भाजपने मनसेच्या पाटील यांना बिनशर्त पाठिंबा दिला, तरीही पाटील यांना विजय मिळवण्यात अपयश आले.
- स्थानिक नेत्यांचा प्रभाव: शिंदे गटाने स्थानिक नेत्यांची ताकद वापरून दोन्ही प्रमुख विरोधकांची मते कमी केली.
मनसे आणि ठाकरे गटाचा पराभव कसा झाला?
मनसेचे राजू पाटील आणि ठाकरे गटाचे सुभाष भोईर यांनी आपापल्या मतदारसंघात मोठी मेहनत घेतली होती. मात्र, शिंदे गटाने योग्य वेळी मोरे यांना प्रचारासाठी उभे करत स्थानीय भूमिपुत्र नेत्यांना पराभूत केले.
मोरे यांच्या विजयाचा जल्लोष
राजेश मोरे यांच्या विजयानंतर शिवसेना (शिंदे गट) आणि त्यांच्या कार्यकर्त्यांनी मोठा जल्लोष केला. ढोल-ताशांच्या गजरात फटाके फोडत, गुलाल उधळत कार्यकर्त्यांनी आपला विजय साजरा केला.
विकासाचे वचन
“हा विजय मतदारांचा विश्वास आहे. विकासाच्या दिशेने काम करून त्यांचं विश्वासार्ह नेतृत्व सिद्ध करू,” अशी प्रतिक्रिया विजयानंतर राजेश मोरे यांनी व्यक्त केली.
कल्याण ग्रामीणमध्ये झालेल्या या विजयामुळे शिवसेना (शिंदे गट) मजबूत झाल्याचे दिसत असून, आगामी राजकीय समीकरणांसाठी ही निवडणूक महत्त्वपूर्ण ठरली आहे.
——-